အိန္ဒိယကို သန်းရွှေလာဖို့ဖိတ်တာ အိန္ဒိယ ကျောင်းသားတွေကလည်း ရှက်တယ်တဲ့

သန်းရွှေ အိန္ဒိယကိုရောက်လာတဲ့ တတိယနေ့မှာ နယူးဒေလီမှာရှိတဲ့ ၂၀၀၇ စက်တင်ဘာလှုပ်ရှားမှုမျိုးဆက် သံဃာတော်တွေ၊ ဗမာနိုင်ငံလုံးဆိုင်ရာ ကျောင်းသားများအဖွဲ့ချုပ်နဲ့အတူ အိန္ဒိယက ကျောင်းသားများအဖွဲ့ (All India Youth Federation) AIYF ကလည်း အတူပူးပေါင်းပြီး အိန္ဒိယအစိုးရကို ကန့်ကွက်ဆန္ဒပြခဲ့ကြပြန်ပါတယ်။




AIYF က ကျောင်းသားခေါင်းဆောင်တယောက်က `ကျနော်တို့ အခုလို လာရောက်ပူးပေါင်းရတာဟာ ကျနော်တို့ အိန္ဒိယအစိုးရက ကမ္ဘာပေါ်မှာ အဆိုးဝါးဆုံး လူသတ်သမားအစိုးရကို လက်ခံဖိတ်မန္တကပြုတာဟာ အိန္ဒိယနိုင်ငံကို သိက္ခာကျစေကြောင်း ပြောချင်လို့ပါ´ လို့ ပြောသွားပါတယ်။



ဆန္ဒပြသူတွေဟာ `အိန္ဒိယအစိုးရ သန်းရွှေစစ်အစိုးရကို မကူညီပါနဲ့´ `စစ်အာဏာရှင်စနစ် ကျဆုံးပါစေ´ ဆိုတာတွေကို အင်္ဂလိပ်၊ မြန်မာ၊ ဟိန္ဒီဘာသာတွေနဲ့ ကြွေးကြော်ခဲ့ကြပါတယ်။



ဆန္ဒပြသူတွေဟာ ဒီနေ့တနေ့လုံး အိန္ဒိယ ပါလီမန်အဆောက်အဦးအနီးက ဂျန်တားမန်တားလမ်းပေါ်မှာ ထိုင်သပိတ်ဲပြုလုပ်ကြမှာဖြစ်ပါတယ်။



မနေ့နေ့လည်ပိုင်းက နယူးဒေလီကိုရောက်လာတဲ့ သန်းရွှေနဲ့အဖွဲ့ကို အိန္ဒိယ သမ္မတ ပါရာတီဘာ ပတေးလ်က ဒီနေ့မနက် သမ္မတ အိမ်တော်မှာ နိုင်ငံတော် အခမ်းအနားနဲ့ ကြိုဆိုခဲ့ပါတယ်။

Photo by: AP

အကြမ်းမဖက် ငြိမ်းချမ်းရေးလမ်းစဉ် ဖခင်ကြီး မဟတ္တမ ဂန္ဓီ ရဲ့ သင်္ချိုင်းကို သွားရောက် ဂါရ၀ ပြုမှာဖြစ်ပါတယ်။ အညာနွေက ကြားသိရတဲ့ သတင်းတွေအရ အဲ့ဒီလို ဂါရ၀ပြုတဲ့အခါကျရင် သန်းရွှေနဲ့အဖွဲ့ကို စစ်ယူနီဖောင်းတွေကို လုံးဝ မ၀တ်ရဘူးလို့ အိန္ဒိယ အစိုးရက တားမြစ်ထားတယ်ဆိုတာပါပဲ။

အိန္ဒိယက အကြမ်းမဖက်လှုပ်ရှားသူတွေ၊ လူ့အခွင့်ရေး လှုပ်ရှားသူတွေက သန်းရွှေရဲ့ ဂန္ဓီသင်္ချိုင်းသွားကန်တော့မှာကို ပြင်းပြင်းထန်ထန် ဝေဖန်ခဲ့ကြပါတယ်။ တမလွန်က ဂန္ဓီကြီးကလည်း သူ့ကို အကြမ်းဖက်လူသတ်သမားတစုက အနှစ်မပါတဲ့ ဂါရ၀ပြုတာကို စိတ်မကောင်းလေလို့လား မသိ ... ဒီနေ့ နယူးဒေလီမိုးကောင်းကင်ကြီးဟာ ထူးထူးခြားခြား မှုန်မှိုင်းနေပြီး ဂန္ဓီကြီးရဲ့ မျက်ရည်မိုးတွေ အဆက်မပြတ် ရွာသွန်းလို့နေပါတယ်။

AIYF အဖွဲ့ကလည်း သန်းရွှေနဲ့အဖွဲ့သွားမယ့် Hyderabad ကိုလည်း သွားဆန္ဒပြ ရှုတ်ချမယ်လို့ ပြောပါတယ်။

သန်းရွှေရဲ့ ခရီးစဉ်ကို လက်ခံမိလို့ အိန္ဒိယ အစိုးရက ရှက်လို့ပဲလား၊ ကြောက်လို့ပဲလား မသိပါဘူး။ အိန္ဒိယ အစိုးရအာဘော် သတင်းစာတွေမှာ ဒီခရီးစဉ်ကို ဒီနေ့အထိ အကျယ်တ၀ံ့ဖော်ပြခြင်း မတွေ့ရသေးပါဘူး။

CPI ဆိုတဲ့ အတိုက်ခံ အိန္ဒိယကွန်မြူနစ်ပါတီကတော့ စစ်အစိုးရလုပ်မဲ့ ရွေးကောက်ပွဲကြီးဟာ အတုအယောင်ကြီးဖြစ်တယ်၊ အိန္ဒိယလို ဒီမိုကရေစီအင်အားကြီးနိုင်ငံတခုဟာ မြန်မာစစ်အစိုးရလို ဒီမိုကရေစီလှုပ်ရှားတဲ့သူတွေကို ဖမ်းဆီထောင်ချနေတဲ့ စစ်အာဏာရှင်ကို လက်ခံတာဟာ အင်မတန်ရှက်ဖို့ကောင်းတယ်။ ဒါကို တကမ္ဘာလုံးမှာရှိတဲ့ ဒီမိုကရေစီရေးလိုလားတဲ့သူတွေက ၀ိုင်းဝန်းဆန့်ကျင်ကြရမယ် လို့ ဒီနေ့ညနေမှာ ထုတ်ပြန်ကြေငြာလိုက်ပါတယ်။


အညာနွေတမာမြေ