သရုပ်ဆောင်သင်တန်းပြီးတော့ . . . ဒါရိုက်တာသင်တန်း

၉.၉.၂၀၁၀ (ကြာသပတေး) နေ့တွင် နာရေးကူညီမှုအသင်း(ရန်ကုန်)တွင် အသင်းသူ/ သားများ၊ လုပ်အားပေးများ၊ အမှုဆောင်များနှင့် စည်ကားသိုက်မြိုက်စွာ ကုသိုလ်ရေးများအတွက် ထမ်းဆောင် ပြင်ဆင်လျှက်ရှိကြသည်။ အကြောင်းမှာ - ၉.၉.၂၀၁၀ ရက်နေ့တွင် နာရေးကူညီမှု အသင်း(ရန်ကုန်)၏ ရှေ့ဆက်ရမည့် လုပ်ငန်းတာဝန်များ၊ ပေးဆပ်မှုများအတွက် ဖွဲ့စည်းပုံ စည်းမျဉ်း စည်းကမ်းများကို ထပ်မံဖြည့်ဆည်းရန် လိုအပ်ချက်များ ရေးဆွဲရန်အတွက် အလုပ်ရုံ ဆွေးနွေးပွဲများ ပြုလုပ်ရန်အတွက် အရေးပေါ် အစည်းအဝေးများ ကျင်းပပြုလုပ်နေခြင်း၊ လူမှုရေးမျိုးဆက်သစ်များ အတွက် အမှတ်စဉ် (၅/၂၀၁၀) သင်တန်း စတင်ပို့ချခြင်းနှင့် ဖျတ်ခနဲပေါ် ဆတ်ခနဲရိုက် အမှတ်စဉ် (၄/၂၀၁၀) ဓါတ်ပုံသင်တန်း နေ့ရက်များနှင့် တိုက်ဆိုင်နေခြင်းကြောင့် ဖြစ်သည်။




ယင်း သင်တန်းများတွင် လုပ်အားပေးလိုသည့်၊ ကုသိုလ်ယူလိုသည့်၊ နာရေးကူညီမှုအသင်း (ရန်ကုန်)သို့ အသင်းဝင်၍ ပေးဆပ်လိုချင်သည့် မျိုးဆက်သစ် လူငယ်/ရွယ်များ များပြားလာခြင်း ကြောင့် ဓါတ်ပုံသင်တန်းပို့ချရာတွင် နေရာထိုင်ခင်း အခက်အခဲကြောင့် ကြမ်းပြင်ပေါ်တွင် ဖျာများ ခင်းကျင်း၍ လူသားအကျိုးပြု ပညာရပ်များကို မညီးမညူ ကြိုးစားပမ်းစား စိတ်ဝင်တစားဖြင့် တက်ရောက်ကြသည်ကို တွေ့မြင်ရမည် ဖြစ်သည်။ ဓါတ်ပုံသင်တန်း ပို့ချရာတွင် ဓါတ်ပုံပညာရှင် နာရေးကူညီမှုအသင်း(ရန်ကုန်) အသင်းသားဖြစ်သူ TV သက်မွန်နှင့် ဥက္ကဌ ဦးကျော်သူတို့မှ သင်ကြား ပို့ချခဲ့သည်။



မျိုးဆက်သစ်လူမှုရေးသင်တန်း အမှတ်စဉ် (၅/၂၀၁၀)တွင် နာရေးကူညီမှုအသင်း(ရန်ကုန်) ဥက္ကဌ ဦးကျော်သူမှ အမှာစကားပြောကြား၍ အမှုဆောင် ဒေါ်မေဇွန်ဦးနှင့် ဦးအေးကြူတို့မှ သင်တန်းကို ပို့ချခဲ့သည်။ ယင်းသင်တန်းသည် နာရေးလမ်းကြောင်းကို ဦးဆောင်၍ သွားရောက်ကူညီ ဖေးမမည့် သင်တန်းသား/သူများအနေဖြင့် နာရေးရှင်တို့နှင့် ဆက်ဆံပြောဆိုရာတွင် ကိုယ်နှုတ်အမူ အရာ ယဉ်ကျေးသိမ်မွေ့ရန် အရေးကြီးသည့်အတွက် ယင်းသင်တန်း၏ ခေါင်းစီးအား “သရုပ်ဆောင် သင်တန်း” ဟု အမည်ပေးခဲ့သည်။



သရုပ်ဆောင်ဟု ဆိုရာတွင် အနုပညာလောကတွင် ကျင်လည် ကျက်စားကြသော မင်းသား မင်းသမီး (သရုပ်ဆောင်များ) မဟုတ်ကြောင်း၊ မိမိတို့ ထမ်းဆောင်ရမည့် ပေးဆပ်ရမည့် လုပ်ငန်းမှာ လူမှုရေးလုပ်ငန်း၊ ဖေးမမှုလုပ်ငန်း၊ ပေးဆပ်မှုလုပ်ငန်း ဖြစ်သည့်အတွက် လူမှုရေး မင်းသား/မင်းသမီးများ ပေါ်ထွက်လာရန် ရည်ရွယ်ကြောင်း၊ ထပ်မံ၍ သရုပ်ဆောင် သင်တန်း ပြီးဆုံးပါက ဒါရိုက်တာ သင်တန်းကို ဆက်လက်သင်ကြားပို့ချ ပေးသွားမည်ဖြစ်ကြောင်း ဦးကျော်သူမှ ပြောကြားသွားခဲ့သည်။

Rest of your post
အညာနွေတမာမြေ