ဒေါက်တာတူးဂျာ ရွေးသောလမ်း ( တူမောင်ညို)

တစ်ကိုယ်တော်ရွေးလမ်းဖြစ်ပါတယ်။
သူနဲ့အတူ(KIO)ကနေ “လမ်းခွဲပြတ်စဲ” ခဲ့ကြတဲ့ အခြားသူတွေမပါဘူးလို့ (မဇ္စျိမ)အင်တာဗျူးမှာပြောတယ်။

လွန်ခဲ့တဲ့ ဖေဖေါ်ဝါရီမှာ ကြံ့ဖွံ့ပါတီ(USDP) ကိုလျှောက်လွှာသွားတင်ခဲ့တာတဲ့။ ကြံ့ဖွံ့ပါတီကသူ့ကိုပါတီဝင်အဖြစ် လက်ခံ လိုက်ပြီလားဆိုတာတော့ အင်တာဗျူးမှာဖေါ်ပြမထားဘူး။ ကြည့်ရတာ လက်မခံသေးဘူးလို့ယူဆရတယ်။

ဒေါက်တာတူးဂျာ တစ်ဦးချင်းလျှောက်လှမ်းရွေးချယ်လုပ်ဆောင်ခဲ့ပုံတွေကို ပြောရရင် အပစ်ရပ်ခဲ့တယ်။ “အမျိုးသား ညီလာခံ”တက်(တက်တက်ကြွကြွပါဝင်ခဲ့တာ) ခဲ့တယ်။ (KIO) နဲ့ လမ်းခွဲပြတ်စဲပြီး နိုင်ငံရေးပါတီ (KSPP) ဖွဲ့စည်းဖို့ “ရွေးကောက်ပွဲ ကော်မရှင်” သို့ တင်ပြခဲ့တယ်။

ဒါပေမယ့် “ရွေးကောက်ပွဲကော်မရှင်”ကပြတ်သားရက်စက်တယ်၊“မှတ်ပုံတင်ခွင့်”မပြောနဲ့“တည်ထောင်ခွင့်” ပင် ချမပေးခဲ့ ပါဘူး။
ဘာကြောင့်တခြားပါတီမရွေးဘဲ။ ကြံ့ဖွံ့ပါတီကိုမှရွေးချယ်ရတာလဲ။

သူဘယ်လိုရွေးချယ်လျှောက်လှမ်းခဲ့တာနဲ့ပတ်သက်ပြီး ဒေါက်တာတူးဂျာကိုယ်တိုင်ပြောထားတာကို ဖေါ်ပြပါရစေ။

“တလှမ်းချင်းလှမ်းသွားတဲ့ ခရီးစဉ် နိုင်ငံရေးအခင်းအကျဉ်းမှာ အတတ်နိုင်ဆုံး ပါဝင်လှုပ်ရှားချင်တာပေါ့ဗျာ။ ဒါကြောင့် ပါတီဖွဲ့စည်းဖို့ မရတဲ့နောက်ပိုင်းမှာ နိုင်ငံရေးကို ဆက်လုပ်ချင်တယ်ဆိုရင် နည်းလမ်းက ဖွဲ့စည်းထားတဲ့ ပါတီတရပ်ရပ်မှာ ပါဝင် လှုပ်ရှားဖို့ပဲကျန်တော့တာပေါ့ဗျာ။ အဲဒီလိုဖြစ်တဲ့အခါကျတော့ လက်တွေ့ကျကျလုပ်ဆောင်နိုင်မယ့်ပါတီက ကြံ့ခိုင်ရေးပါတီ (USDP) ပဲဖြစ်တယ်”

တကယ်တော့ဒီလမ်းကိုဒေါက်တာတူးဂျာ က စွန့်ဦးတည်ထွင်လျှောက်လှမ်းခဲ့တာတော့မဟုတ်ပါဘူး။

ဒေါက်တာတူးဂျာ ရှေ့မှာ-
“အပစ်ရပ်ကိုးကန့်အဖွဲ့ ” မှ
- ဦးပယ်စောက်ချိန် (ခ) ဦးဘေဆော်ချိန် ၊ လောက်ကိုင်(၁) ရှမ်းပြည်နယ်လွှတ်တော်
- ဦးမြင်ရှော်ချန်း(ခ) ဦးမြီရှောက်ချန်း ၊ လောက်ကိုင် (၂) ရှမ်းပြည်နယ်လွှတ်တော်
(KNU) ခွဲထွက် (ဘုရားကုန်းအထူးဒေသငြိမ်းချမ်းရေးအဖွဲ့) မှ
- ပဒိုအောင်ဆန်း ဖာပွန်(၂) ၊ ကရင်ပြည်နယ်လွှတ်တော်
ကချင်ပြည်နယ်အထူးဒေသ(၁) NDA(K) မှ
- ဦးစခုန်တိန့်ယိန်း ၊ ကချင်ပြည်နယ်၊အမှတ်(၄) အမျိုးသားလွှတ်တော်/တသီးပုဂ္ဂလ၊(ကြံ့ဖွံ့ပါတီ)နဲ့ မဟာမိတ်။
တို့ရှိပါတယ်။
သူတို့တတွေနဲ့နှိုင်းယှဉ်ရင် ဒေါက်တာတူးဂျာအဖို့နောက်ကျနေပါပြီ။

သူတို့က လွှတ်တော်ထဲမှာရောက်နေကြပြီ။ ပဒိုအောင်ဆန်းဆိုရင် ကရင်ပြည်နယ်လွှတ်တော်ရဲ့ “တိုင်းရင်းသားရေးရာ ကော်မတီ မှာဥက္ကဋ္ဌ” ဆိုလားဖြစ်နေတယ်။

ဘာကြောင့်သူတို့တတွေဒီလိုလမ်းကို ရွေးချယ်နိုင်တာလဲ။ဆိုတာ စဉ်းစားကြည့်မိတယ်။ သူတို့တတွေမှာ တူညီနေတာ တစ်ခုထဲပဲတွေ့တယ်။ တခြားမဟုတ်ဘူး။

တစ်ချိန်က “မိမိကိုယ်စားပြုရပ်တည်ဆောင်ရွက်ခဲ့တဲ့ အဖွဲ့အစည်းနဲ့ လူမျိုးအရေး” ဆိုတဲ့လမ်းကို ပြတ်ပြတ်စဲစဲ ကျောခိုင်း စွန့်ပယ်နိုင်ခဲ့ကြတယ်” ဆိုတဲ့အချက်ပဲဖြစ်ပါတယ်။

အမျိုးသားဒီမိုကရေစီအင်အားစု (NDF) က ပုဂ္ဂိုလ်များက အလားတူပါပဲ။

မိခင်(NLD)ကိုခြေစုံကန်ခဲ့ပြီးရွေးကောက်ပွဲကိုမျက်နှာမူခဲ့ကြတာပဲလေ။
ပါတီခေါင်းဆောင်ကတော့ ဒုတိယအကြိမ်ခံဝန်ချက်လက်မှတ်ထိုးခိုင်းတာကိုငြင်းပယ်လိုက်တော့ ရွေးကောက်ပွဲဝင်ခွင့် မရခဲ့ဘူးလေ။
ပြီးတော့ဒီလမ်းဟာ “သခင်တင်မြ၊ မောင်စူးစမ်း၊ ကျော်ဝင်း” တို့ ညွှန်သောလမ်းလည်းဖြစ်ပါတယ်။
အကယ်၍ ကြံ့ဖွံ့ပါတီကများ လက်မခံခဲ့ရင် ဘယ်လိုလမ်းကိုများဒေါက်တာတူးဂျာ ရွေးချယ်လျှောက်လှမ်းဦးမှာလိမ့်။
ဒါကြောင့် ဒေါက်တာတူးဂျာရွေးသောလမ်းမှာ ဒေါက်တာတူးဂျာဘယ်လိုနေရာကိုမျှော်မှန်းထားတယ်ဆိုတာကို ဒေါက်တာတူးဂျားပြောတဲ့စကားနဲ့ ပဲ နိဂုံးချုပ်ပေးလိုက်ပါတယ်။

“ကြံ့ခိုင်ဖွံ့ဖြိုးရေးပါတီမှာလျှောက်ထားပါတယ်။လျှောက်တာကတော့မြို့မိမြို့ဖအနေနဲ့ပါဝင်လှုပ်ဆောင်သွားဖို့ပါ’’
“စစ်အစိုးရနဲ့ အဆင်ပြေမယ့် နည်းလမ်းကို ရှာစေချင်တယ်လေ။ အသွင်ကူးပြောင်းရေးကို လက်ခံသွားနိုင်အောင် ကြိုးစား စေချင်တယ်။တခြားနည်းလမ်းတော့မရွေးစေချင်ဘူး’’တဲ့။

တချိန်က“ ကချင်အမျိုးသားအရေးတိုက်ပွဲဝင်ခဲ့သူ/“တိုင်းရင်းသားခေါင်းဆောင်” အခုတော့ “မြို့မိမြို့ဖ”။