အန်တီစုရဲ့ ၆၅ နှစ်ပြည့်မွေးနေ့

ဒီနေ့ ဇွန် ၁၉ ရက်ဟာ အန်တီစုရဲ့မွေးနေ့။

အန်အယ်လ်ဒီ အဖွဲ့ဝင်တွေကတော့ အန်တီစုရဲ့ မွေးနေ့ကို မြန်မာနိုင်ငံအမျိုးသမီးများနေ့အဖြစ် သတ်မှတ်ပြီး အထိမ်းအမှတ်တွေလုပ်ကြတယ်။

သံဃာတွေကို ဆွမ်းကပ်ကြတယ်။ ငှက်တွေ၊ ငါးတွေ ဘေးမဲ့လွှတ်ကြတယ်။ နိုင်ငံရေးအကျဉ်းသားတွေရဲ့ သားသမီးတွေ ပညာရေးအတွက် ထောက်ပံ့တာတွေ လုပ်ကြတယ်။ သွေးတွေလှူကြတယ်၊ သစ်ပင်တွေစိုက်ကြတယ်။

အခြားအခြားသော နိုင်ငံတကာနဲ့ မြန်မာ အဖွဲ့အစည်းတွေ … မွေးနေ့ရှင်မရှိတဲ့ မွေးနေ့ပွဲတွေ၊ အထိမ်းအမှတ်ပွဲတွေကို ပုံစံအမျိုးမျိုးနဲ့ ကျင်းပကြပြီး အန်တီစုကို အမြန်လွှတ်ပေးဖို့တောင်းဆိုကြတယ်။ အမြန်ဆုံးပြန်လွတ်ပါစေလို့ ဆန္ဒတောင်းဆုတွေ ပြုကြတယ်။

လက်နက်ဆိုလို့ အပ်တိုတချောင်းတောင် မရှိတဲ့ အမျိုးသမီးတယောက်ကို သူ့ရဲ့ ၆၅ နှစ်ပြည့်မွေးနေ့မှာတောင် ချုပ်ထားနိုင်တယ်ဆိုပြီး နျူကလီယားလက်နက်ရူး ရူးနေတဲ့ စစ်အဆိုးရအုပ်စုကတော့ ပျော်ပွဲဆင်နေလေမလားပဲ …

ရန်ကုန်မြို့ .. အင်းလျားကန်စောင်းက အထီးကျန်အိမ်ကြီးထဲမှာတော့ .. အချုပ်အနှောင်ခံဘ၀နဲ့ နေထိုင်နေရတဲ့ အန်တီစု ..
အခုအချိန်ဆို ဘာတွေများ လုပ်နေမလဲ … ဘုရားဝတ်ပြုနေမလား … တချိန်က မိသားစုစုံစုံလင်လင်နဲ့ လွတ်လွတ်လပ်လပ်နေရတုန်းက အချိန်တွေကို ပြန်တွေးကြည့်နေမလား …

သေချာတာတခုကတော့ သူ့ရဲ့မွေးနေ့ဆိုတာကို ခေတ္တခဏလေးပဲ အမှတ်ထားပြီး … နူးညံ့တဲ့ စိတ်အစုံနဲ့ မေတ္တာပို့နေမယ် … တိုင်းသူပြည်သားတွေအတွက် ဘာတွေ ဘယ်လိုဆက်လုပ်မလဲဆိုတာကို အဆင်မပြတ် တွေးတောနေမယ်ဆိုတာပါပဲ …

(ကိုယ်ကျိုးစွန့် အနစ်နာခံပြီး တိုင်းသူပြည်သားတွေရဲ့ဘ၀တွေအတွက် သူ့ဘ၀နဲ့လဲခဲ့တဲ့ အန်တီစုရဲ့ ၆၅ နှစ်ပြည့် မွေးနေ့ အမှတ်တရ)

အညာနွေတမာမြေ