မြန်ပြည်တလွှား ရွေးကောက်ပွဲ သတင်းများ အပိုင်း(၅) မြ၀တီကို ဒီကေဘီအေ သိမ်းတာပါတယ်

ငပုတော

ဧရာဝတီတိုင်း ငပုတောမြို့ မဲဆန္ဒနယ် ၁ မှာ မဲဆန္ဒရှင် တဝက်လောက် မဲပေးပြီးဖြစ်လို့ ဒီနယ်မှာ အမျိုးသား ဒီမိုကရေစီ အင်အားစု NDF အခြေအနေ ကောင်းတယ်လို့ ပြိုင်ဘက်တဦးဖြစ်တဲ့ ငပုတော ကရင်ပြည်သူ့ပါတီ KPP ကိုယ်စားပြု ပြည်သူ့လွှတ်တော် အမတ်လောင်း မန်းထွန်းတင်က မဇ္ဈိမကို ပြောပါတယ်။

“ငပုတောမြို့ပေါ် မဲဆန္ဒနယ် အမှတ် ၁ မှာတော့၊ တဝက်လောက် ထည့်ပြီးသွားပြီ။ အဲဒီမှာ မဲဆန္ဒရှင်တွေ ပြောတာက NDF ကို မဲထည့်တာများတယ်ဗျ။ ဒီမှာတော့ လွပ်လွပ်လပ်လပ် မဲပေးလို့ ရပါတယ်” လို့ သူက ဆိုပါတယ်။

ငပုတောမြို့နယ်မှာ NDF ၊ တစည ၊ ကြံ့ဖွံ့နဲ့ KPP တို့ ဝင်ပြိုင်နေတာပါ။

မုံရွာမဲရုံ မဲထည့်သူနည်း

စစ်ကိုင်းတိုင်း မုံရွာမြို့ လှည်းတန်း ရပ်ကွက်ထဲက အမက မူလတန်းကျောင်းရှိ မဲရုံကို ဒီကနေ့ နေ့လည် ၁ နာရီကျော်မှာ မဲထည့်သွားသူက မဲရုံမှာ လူရှင်းနေတယ်လို့ ဆိုပါတယ်။

’’ဒီနေ့ မဲသွားပေးတယ်။ မြင်ကွင်းလည်း ရှင်းတယ်၊ လူလည်း ရှင်းတယ်။ အခုပဲ မဲထည့်ပြီးတော့ ပြန်လာတယ်။ မဲလာပေးတဲ့လူက ၃-၄ ယောက်လောက်ပဲ ရှိတယ်။ မဲရုံးပတ်ဝန်းကျင်မှာ ဘာမှ မရှိဘူး။ ဆရာ၊ ဆရာမတွေပဲ ရှိတယ်။ အမျိုးသား ဒီမိုကရေစီ အင်အားစုနဲ့ ဒီမိုကရက်တစ်ပါတီ (မြန်မာ) ကိုပဲ မဲထည့်ခဲ့တယ်။ တာဝန်အရ သွားပြီး ထည့်လိုက်တာပါ’’လို့ သူက ပြောပါတယ်။

မုံရွာမှာ သူထည့်ခဲ့တဲ့ ၂ ပါတီအပြင် တစည၊ ကြံ့ဖွံ့နဲ့ ပြည်ထောင်စု မြန်မာနိုင်ငံ အမျိုးသားနိုင်ငံရေး အဖွဲ့ချုပ်တို့ ယှဉ်ပြိုင်ပါတယ်။ တိုင်းဒေသကြီး လွှတ်တော်အတွက်တော့ တစည နဲ့ ကြံ့ဖွံ့ပဲ ပြိုင်ကြတာပါ။

ရန်ကုန်တိုင်း ကတချို့

မဲရုံ အမှတ်၁ ကျောက်မြောင်း အချိန် ၁၁း ၄၀ တွင် မဲပေးသူမရှိ

မဲရုံ အမှတ် ၅ ဘိုးလိန်း အောင်မင်္ဂလာ အချိန် ၁၁း ၄၂ တွင် မဲရုံအတွင်း မဲပေးသူမရှိ

မဲရုံ အမှတ် ၄ မင်္ဂလာတောင်ညွန့် အချိန် ၁၁း ၄၃ တွင် မဲရုံ အတွင်း မဲပေးသူမရှိ

မဲရုံ အမှတ် ၈ မင်္ဂလာတောင်ညွန့် အချိန် ၁၁း ၄၈ တွင် မဲရုံအတွင်း မဲပေးသူမရှိ

မဲရုံ အမှတ် ၁ အထက်ပုဇွန်တောင် အချိန် ၁၁း၅၅ တွင် မဲရုံအတွင်း မဲပေးသူမရှိ

မဲရုံ အမှတ် ၅၀ ဗိုလ်တထောင်တွင် အချိန် ၁၁း၅၉ တွင် မဲရုံအတွင်း မဲပေးသူမရှိ

မဲရုံ အမှတ် ၈ ပန်းဆိုးတန်း အချိန် ၁၂း ၃၀ တွင် မဲရုံအတွင်း မဲပေးသူမရှိ

အင်းစိန် မြို့နယ် ၊ ရွှေပြည်သာ မြို့နယ်တို့တွင် မဲရုံ သွားရောက်သူ အများအပြားရှိ ၊ တိုင်းဒေသလွတ်တော်အတွက် မဲပုံး၂ ခုသာရှိကြောင်းကို ကိုယ်တိုင်မဲပေးခဲ့သူတစ်ဦးမှ ပြောပြခဲ့

သာစည်မြို့နယ်

သာစည်မြို့နယ် ဟံဇားတိုက်နယ်ကျေးရွာကြီးရှိ မဲရုံများတွင် မဲပေးသူမှာ မနက် ၈ နာရီခန့်က အနည်းငယ်သာရှိခဲ့ပြီး ယခုအချိန်တွင် မဲပေးသူ တဦးမျှ မရှိ၍ ကြံ့ဖွံ့ပါတီဝင်များက ဆိုင်ကယ်များ၊ ကားများဖြင့် တအိမ်တက်ဆင်း မဲလာပေးရန် လိုက်လံ လှုံ့ဆော်နေကြောင်း၊ ခြိမ်းခြောက်ခံရ၍ မဲသွားပေးသူများကလည်း ပယ်မဲဖြစ်စေရန် ကြက်ခြေခတ်များ ပြုလုပ်ခဲ့ကြောင်း ဟံဇားဒေသခံ တဦးကပြောသည်။ ထို့အတူ သာစည်မြို့ပေါ်ရှိ မဲရုံများတွင်လည်း မဲလာပေးသူ အနည်းငယ်သာရှိ၍ ကြံ့ဖွံ့ပါတီဝင်များက မဲလာပေးရန် လိုက်လံနှိုးဆော်နေကြသည်ဟု ပြောသည်။

ရန်ကုန် တောင်ပိုင်းခရိုင် သုံးခွမြို့

ရန်ကုန်တောင်ပိုင်းခရိုင် သုံးခွမြို့ရှိ အမှတ် (၉)ရပ်ကွက် မဲရုံတွင် ကြံ့ဖွံ့ပါတီကို အတင်းအကြပ်မဲပေးခိုင်းမှုနှင့် ပတ်သက်ပြီး ကြံ့ဖွံ့ပါတီဝင်များနှင့် အန်ဒီအက်ဖ် ပါတီဝင်များ အခြေအတင် စကားများမှုများရှိကြောင်း၊ မဲရုံ အမှတ်(၃) တွင် အန်ဒီအက်ဖ် ပါတီဝင်များက မဲရုံတွင်း စစ်ဆေးမည်ပြုရာ ကော်မရှင်ရုံး တာဝန်ရှိသူများက စစ်ခွင့်မပေးသောကြောင့် အခြေအတင်ဖြစ်ပွားခဲ့ကြောင်း၊ သုံးခွမြို့ ညောင်လေးပင်ကျေးရွာတွင် မဲစလစ်များ ပေးဝေခြင်းသာဖြစ်ကြောင်း ပြောဆိုပေးခဲ့သော်လည်း ကြိုတင်မဲပေးပြီးဖြစ်ကြောင်းပြောဆိုသောကြောင့် မဲပေးခွင့်မရခဲ့ကြောင်း၊ သုံးခွမြို့နယ်နှင့် ပတ်ဝန်းကျင်ကျေးရွာရှိ မဲရုံများမှာ ၉၀ ပြည့်နှစ် ရွေးကောက်ပွဲနှင့် ကွဲပြားစွာ စိတ်ဝင်စားမှုနည်း၍ မဲပေးသူဦးရေမှာ ၃ပုံ ၁ပုံခန့်ပင် မရှိကြောင်း၊ မဲရုံတွင် တာဝန်ကျသော ရယက အဖွဲ့ဝင်များ၊ မဲရုံမှူးများမှာ အိပ်ပျော်၍ပင်နေကြကြောင်း လေ့လာသူများက ပြောသည်။

လင်းခေး

ရှမ်းပြည်တောင်ပိုင်း လင်းခေးမြို့နယ် ပမ်ပေါင်းရပ်ကွက် မဲရုံ၌ မဲများကို ရေတွက်ရာတွင် SNDPက အနိုင် ရရှိ ကြောင်း ပါတီမှ ၀င်ရောက် အရွေးချယ်ခံသူ ဦးစိုင်းလှကျော် က ပြော သည်။ “ပြည်သူ့ လွှတ်တော် အတွက် ပယ်မဲ ၁၈ မဲ၊ ကြံ့ဖွံ့ က ၃၇ မဲ၊ ကျားဖြူ က ၆၉ မဲ။ အမျိုးသား လွတ်တော် အတွက် ပယ်မဲ ၂၅ မဲ၊ ကြံ့ဖွံ့ က ၃၉ မဲ၊ ကျားဖြူ က မဲ ၆၀ ။ ပြည်နယ် လွှတ်တော် အတွက် ပယ်မဲ ၁၆ မဲ၊ ကြံ့ဖွံ့ က ၃၆ မဲ၊ ကျားဖြူ က ၇၂ မဲ ရပါတယ်။ သက်ဆိုင်ရာ လူကြီး တွေ ရှေ့မှာ မဲကို ရေတွက်လိုက်ပါတယ်”ဟု ၎င်းက ဆိုသည်။ ပမ်ပေါင်း ရပ်ကွက်တွင် မဲ ပေးရမည့် သူ ၃၃၆ ဦး ရှိရာ ၁၂၄ ဦး လာရောက် မဲ ပေးခဲ့ကြောင်း သိရသည်။

မြ၀တီကို ဒီကေဘီအေ သိမ်းပြီ

ယနေ့ ရွေးကောက်ပွဲ ကျင်းပနေစဉ်မှာပင် ကရင်ပြည်နယ် မြ၀တီမြို့ကို တိုးတက်သော ဗုဒ္ဓဘာသာ ကရင် အမျိုးသား တပ်မတော် (DKBA) ဗိုလ်နှုတ်ခမ်းမွေး အဖွဲ့က နေ့လယ်ပိုင်းတွင် သိမ်းလိုက်ကြောင်း သိရ သည်။ မြ၀တီ ရဲ စခန်း အပါအ၀င် အချက်အချာ ကျသည့် နေရာများကို DKBA တပ်မဟာ ၉၉၉ နှင့် တပ်ရင်း ၉၀၇ တို့က သိမ်းလိုက်ခြင်း ဖြစ်သည်ဟု ဗိုလ်နှုတ်ခမ်းမွေး ခေါ် စောလားပွယ် က ပြောသည်။ ဗိုလ်နှုတ်ခမ်းမွေး အဖွဲ့သည် စစ်အစိုးရ ကမ်းလှမ်းထားသော နယ်ခြားစောင့်တပ် ဖွဲ့စည်းရေးကို ငြင်းဆန်သည့် အဖွဲ့ ဖြစ်သည်။ မြ၀တီမြို့ခံ တဦးကလည်း“ မြ၀တီမှာ အခြေအနေမကောင်းဘူး၊ တချို့တွေကတော့ မဲဆောက် ဘက် ရှောင်သွားနေကြပြီ”ဟု ဆိုသည်။