သတင်းစာ ဆရာနှင့် စာရေး ဆရာကြီး လူထုဦးလှရဲ့ အသက် တရာပြည့် မွေးနေ့ အခမ်းအနားကို မန္တလေးမြို့ မြတောင်တိုက်၊ ရာပြည့်ဗိမာန်ခန်းမမှာ ဒီနေ့ လုပ်ခဲ့ပါတယ်။
မြတောင်ရာပြည့်ဗိမာန်အဲ့ဒီ အထိမ်းအမှတ် စာတမ်း ဖတ်ပွဲကို အစက Oriental House မှာလုပ်ဖို့ စီစဉ်ထားပေမယ့် ပွဲမိန့် မရခဲ့တာကြောင့် နေရာပြန်ရွေးရာမှာ သခင် ကိုယ်တော်မှိုင်း စာပေ သင်ကြားခဲ့ဖူးတဲ့ မြတောင် ကျောင်းတိုက် မှာ လုပ်ခဲ့တာဖြစ်ပါတယ်။
ဒီအခမ်းအနားကို သတင်းစာ ဆရာကြီး ဟံသာဝတီ ဦးဝင်းတင် အပါအ၀င် စာရေးဆရာ အံ့မောင်၊ ကဗျာဆရာ ကိုလေး (အင်းဝ ဂုဏ်ရည်)၊ ကဗျာဆရာ မောင်လွင်မွန် (ကသာ)၊ စာရေး ဆရာမ မိချမ်းဝေ၊ စာရေးဆရာ မောင်စူးစမ်း၊ စာရေးဆရာ နေ၀င်းမြင့် စတဲ့ စာပေ ပညာရှင်တွေ လူထုဦးလှကို ချစ်မြတ်နိုးသူတွေ တက်ရောက်ခဲ့ကြပါတယ်။
ဘဘဦးဝင်းတင်ပြန်ပြီ ...........ဖုန်းဆက်ပြီး သတင်းပို့နေတဲ့ စစ်အစိုးရ ထောက်လှမ်းရေး
သတင်းလာယူတဲ့ ထောက်လှမ်းရေးတွေကလည်း ဓာတ်ပုံတွေရိုက်၊ အချိန်နဲ့အမျှ သတင်းတွေ ဖုန်းဆက်ပို့နဲ့ပေါ့ဗျာ။
မနက်ပိုင်းမှာတော့ ပရိတ်တရားနာယူ၊ ရေစက်ချအမျှဝေတာတွေ၊ သံဃာတော် ၅၅ ပါးကို နေ့ဆွမ်းကပ်လှူဒါန်းတာတွေ လုပ်ပြီးတော့ သ၀ဏ်လွှာတွေ စာတမ်းတွေ ဖတ်တာကိုတော့ နေ့လည်ခင်းမှာ လုပ်ခဲ့ပါတယ်။
သ၀ဏ်လွှာတွေထဲမှာတော့ သတင်းစာဆရာကြီး ဦးဝင်းတင်ရဲ့ လူထုကို မျက်နှာမူသည့် တရားကို ခိုင်ခိုင်မြဲမြဲ ဆွဲကိုင်၍ တပါးသူကိုလည်း သွန်သင်ပေးသည့် လူထုဦးလှ၏ စိတ်ဓာတ်အကြောင်း၊ ဆရာ ဦးသော်ကောင်းရဲ့ လူထုဦးလှ၏ လက်တုံ့ပြန်လိုစိတ် မရှိခြင်းနှင့် သည်းခံခြင်းကို ချီးကျူးရေးသားထားသော သ၀ဏ်လွှာ တွေကို စာရေးဆရာ ညီစေမင်းနဲ့ စာရေးဆရာ ဆူးငှက်တို့က ဖတ်ပြခဲ့ပါတယ်။ လူထုစိန်ဝင်းပေးပို့ တဲ့ လူထုဦးလှနဲ့ နိုင်ငံရေး လူထုဦးလှနဲ့  နိုင်ငံရေး စာတမ်းကိုတော့ ဆရာကျော်ရင်မြင့်က ဖတ်ကြာခဲ့ပါတယ်၊
မိချမ်းဝေနှင့် စိုးနိုင် (မန္တလေး တက္ကသိုလ်)တို့က စာရေးဆရာမကြီး ဒေါ်ခင်နှင်းဦး၏ သ၀ဏ်လွှာနှင့် ပုံပြင်ဦးလှ စာတမ်းအားဖတ်ကြားစဉ်
လူထုစိန်ဝင်း၊ ဒဂုန်တာရာ၊ ကလျာ (၀ိဇ္ဇာ၊ သိပ္ပံ)၊ ဒေါ်ခင်နှင်းဦး၊ ဆရာဝင်းငြိမ်း၊ စိုးနိုင် (မန္တလေး တက္ကသိုလ်) တို့ရဲ့ စာတမ်းတွေ၊ ကဗျာတွေ၊ သ၀ဏ်လွှာတွေကိုလည်း ဖတ်ခဲ့ကြပါတယ်။
လူထုဦးလှ၏ ကိုယ်ရေးအကျဉ်း
ပြည်သူ့ အကျိုးပြု စာပေများကို ရေးသားခဲ့သော လူထု ဦးလှကို ၁၉၁၀ ခုနှစ် ဇန်န၀ါရီ ၁၉ ရက်နေ့တွင် ပဲခူးတိုင်း ညောင်လေးပင် မြို့နယ် ပုစွန်မြောင်း ရွာတွင် ဦးပု၊ ဒေါ်ခိုင်တို့မှ မွေးဖွားခဲ့ပြီး ၁၉၈၂ ခု သြဂုတ်လ ၇ ရက်နေ့ မန္တလေးမြို့၌ ကွယ်လွန် ခဲ့သည်။
၁၉၃ဝ ပြည့်နှစ်တွင် ရန်ကုန် အစိုးရ အထက်တန်း ကျောင်းမှ ၁ဝ တန်း အောင်ခဲ့ပြီးနောက် စာရင်းကိုင် သင်တန်းတက်ရင်း လူငယ်များ ကြီးပွားရေး သတင်းများကို သတင်းစာတိုက်များသို့ ပေးပို့ခဲ့သည်။ ထိုမှ လူငယ်များ ကြီးပွားရေး အသင်း ညကျောင်း ဆရာအဖြစ် တာဝန်ထမ်းဆောင်ရင်း “ကြီးပွားရေး မဂ္ဂဇင်း” စတင်ထုတ်ဝေသည့် ၁၉၃၂ တွင် စာများ စတင်ရေးသား ခဲ့သည်။
ဒုတိယ ကမ္ဘာစစ် ဖြစ်ပွားသည့်ကာလ မဂ္ဂဇင်းများ ရပ်နားထားချိန်တွင် ကိုယ်ပိုင် စာအုပ်များ ရိုက်နှိပ်ထုတ်ဝေခဲ့သည်။ ထိုမှ လူထု ဂျာနယ်၊ လူထု သတင်းစာ တို့ကို ထုတ်ဝေခဲ့သည်။
ဂျပန်ခေတ်အတွင်းက အာရှလူငယ် အသင်း ခရိုင် ဥက္ကဋ္ဌ လုပ်ခဲ့သောကြောင့် ၁၉၄၅ တွင် ဗြိတိသျှ နယ်ချဲ့၏ အဖမ်းဆီး ခံရခြင်း အပါအဝင်၊ ဖဆပလခေတ်၊ မဆလ ခေတ်တို့၌ လူထုအပေါ် ဖိနှိပ်မှုများ၊ လူထုခံစားနေရသည်များကို ရေးသားခဲ့ခြင်းများကြောင့် ဖမ်းဆီးခံရပြီး ၅ ကြိမ် တိတိ ထောင်တွင်းနေထိုင်ခဲ့ရသည်။
လူထုဦးလှသည် ထောင်နှင့် လူသား၊ စစ်ပြီးစက ထောင်တံခါး၊ လှောင်ချိုင့်တွင်းမှ ငှက်ငယ်များ စသည့် သူ၏ထောင်တွင်း အတွေ့အကြုံ စာအုပ်များ၊ ကျနော် သတင်းထောက်၊ ကျနော် မြင်းသမား၊ ကျနော် ဗြူရိုကရက်၊ သတင်းစာများသည် သမိုင်းကို ပြောနေကြသည်၊ သတင်းစာများ ပြောပြတဲ့ စစ်တွင်း မြန်မာပြည် စသည့် စာအုပ်များ၊ တိုင်းရင်းသား ရိုးရာ ပုံပြင်များ၊ ရွှံ့နှင့် စစ်သား၊ ပန်းနှင့် စစ်သား၊ ဆိုဗီယက် ရုရှား စသည့် ဘာသာပြန် စာပေများကို ရေးသားခဲ့သည်။
သူရေးသားခဲ့သော 'ထောင်နှင့် လူသား' မှာ စာပေဗိမာန် စာပဒေသာဆု၊ 'လှောင်ချိုင့်တွင်းမှ ငှက်ငယ်များ' မှာ ယူနက်စကို စီးပွားရေး လူမှုရေး ဆိုင်ရာဆု၊ 'ရခိုင် ကျေးလက် ပုံပြင်များ' မှာ စာပေဗိမာန် အနုပညာ စာပေဆုတွင် ကလေး သူငယ် ဆိုင်ရာ စာပေ ဒုတိယဆုများ ရရှိခဲ့သည်။
(လူထု ဦးလှ၏ ကိုယ်ရေး အချက်အလက်များကို ဧရာဝတီ သတင်းစာမျက်နှာမှ ကူးယူ ဖော်ပြသည်။ ပုံများပေးပို့သော ကဗျာဆရာ မည်းမှောင်နက်တူး ကို ကျေးဇူးတင်ပါသည်။)
အညာနွေတမာမြေ
Posts
No comments:
Post a Comment